الحل الاكيد بعون الله للرهاب الاجتماعي

الحل الاكيد بعون الله للرهاب الاجتماعي

بسم الله الرحمن الرحيم

السلام عليكم ورحمة الله وبركاته وبعد

ما دعاني لكتابة هذا الموضوع هو الالام التي قراتها في هذا القسم


اولا اريد ان اتحدث معكم عن اشياء تجاهلها الكثير

كل مشكلتكوا هى الرهاب الاجتماعي خلونا نشيل المسمى دة ونقول بتحث بخوف من الكلام امام الاخرين طب اية السبب

السبب هو خايف لا مش تعرف تعبر او خايف لا تتلغبط او خايف لا اللى بيسمعوك يقولوا دة مش بيعرف يكلم او يقولوا دة خجول اوي اية دة

او يقولوا دة لبخة اوي دة ايه دة هو في حد بالشكل دة

انا وضعت كل الاحتمالات التى من الممكن تكون سبب المشكلة ناا مش هاسميه مرض لانه هو مشكلة وقتيه فقط
اية اللى بيمنعكوا من الكلام هو شعور داخلي قهري غصب عنكم طب الموضوع كبرر اوي عندكم ليه اكيد له اسباب داخلية عندكم وهى انكم مش تعرفوا ان الشيء دة طبيعي جدا
كل الناس بتخاف من التحدث امام العامة الكل بلا استثناء بس اية اللى بيخلي ناس انها تكلم عادي كدة وهو التعود اتحط في مجال عمل خلاه لازم يكلم فمرة في التانية اتعلم وخلاص
بقى لبلب في الكلام امام الناس وبقى بيقنع احكيلكم حكاية اخويا المحامي اول مرة كان هايروح يتكلم ادام القاضي كان خايف ومرعوب فبيقولي هاعمل اية قلتله
ومن يهاب صعود الجبال يعيش ابد الدهر بين الحفر
قلتله حط الكلمة دي ادام عنيك خليك زي الاسد ان سكت تعلوك المهابة وان اتكلمت تكلم بكل طيب وخير ولو حسيت انك مش عارف تكلم اسكت وخد نفس وحط عينك في مكان غير عين القاضي وكمل كلامك
اول مرة حسيت انه كان صعب عليه وعرقان وحالته حاله بس عادي كلنا مرينا في بدايات عملا بنفس الظروف والان هو بيقف ادام المحكمة كلها يرجها بصوته والسبب انه
واجهة المشكلة لان دي خطوة الكل بيمرها فيه اللى بيقف يقول عليها مرض واللى يقول عليها كارثة واللى يقول عليها دة مرض مزمن صعب علاجه ولا هى مرض ولا كارثة
ولا حاجة خالص هى زيها زي اي مشكلة عايزة المواجهة واللى يحصل يحصل اعرق اول مرة واتلغبط اول مرة وبعد كدة هابقى عادي جدا .

الحلول لمشكلة الرهاب الاجتماعي او الخوف

انا هاحلهالك ببساطة
العريس ليلة دخلته بيبقى خايف من الفشل اية السبب خايف من كلام الناس وانه مش راجل والكلام دة بس بيعمل اية في الاول بيضطرب وبعدين خلاص بيعرف ان الخوف بس كان بسبب انه لسة في الاول
طب انت بتفتكر ان القادة اللى بيجيوا يكلموا ادام ملايين البشر بيكلموا بطلاقه كدة ادامهم عادي لا دول خدوا دورات اقناع ودورات ادارة وفنون القاء
وبيبقوا مدربين واتعودوا خلاص على كدة كل يوم بيكلموا ادام الناس خلاص اتعودوا وبقى الموضوع سهل جدا بالنسبة ليهم

طب الخوف دة طبيعي ؟

طبيعي جدا جدا جدا

انا بلقي محاضرات بحكم عملي كمدرب دورات كمبيوتر ساعات بيقعد ادامي اكثر من 100 طالب في كل بداية دورة بحس بشيء من الرهبة بس بتاخد دقيقة اتنين و خلاص ومع بداية التعارف ببعض بينتهى كل شيء
يا جماعة الرهبة في بداية عمل كل شيء دة في النفس البشرية دة طبيعي جدا المهم انك خلاص مش تحط في دماغك لان دة طبيعي جدا جدا
لاحظ انك لما بتتقدم في وظيفة جديدة وبيعملولك مقابلة بتحس باضطراب وكل البشر بيحسوا الخوف دة واتحدى اي حد مش بيحس الخوف دة انتوا مش بتلاحظوا الممثلين في
اللقاءات على الهوا في بداية الكلام بيكونوا متوترين وكلامهم في رجفه دة شيء طبيعي جدا اي انسان لا يفعل شيئ كثير يهابه ولكن لفترة كل البشر كدة
انا افتكر ممثلة وقفت ادام الرئيس مبارك وخافت مش عرفت تكمل كلامها وقالت انا راهبة الموقف اوي
عادي جدا يمكن لو اتكرر هاتعرف تتكلم وبطلاقه المشكلة ان انتوا مكبرين الموضوع اوي وزيادة عن اللزوم الخوف طبيعي جدا في النفس البشرية
وبيحصل لكل الناس وبيحصل في اي مكان والانسان وشه بيحمر اوقات وبيخجل اوقات كل دة طبيعي جدا ولا هى مشكلة ولا هى مرض دة امر طبيعي جدا بينتهي بالوقت وبالمواجهة
انما انا بالنسبة ليا بحس ان هى زي رهبة البداية اي بداية في حديث لها رهبة لما بتدخل مكان لاول مرة هاتدخله بتحس برهبة ولما تزوره كتير بتبقى بعد كدة داخل بقلب جريء
لما تكلم دكتور في الجامعة لاول مرة امام الدفعة بتحس برهبة وبعد كدة بتحس انك عادي في الكلام امامهم لما بتكلم خطيبتك لاول مرة بتبقى شوية مش عارف تقول اية
وبعد كدة بتكون لبلب في الكلام لما بتدخل بيت اهل خطيبتك بتبقى ملبوخ جدا
وحاسس برهبة لان العين عليك وبعد زيارة واتنين بتحس انك واحد من البيت وبتكلم اكتر منهم
قيسوا الكلام دة على الكلام امام الاخرين
هاتلاقي ان البداية فقط طب لسة برردو خايفين نكلم ادام الناس هانعرق ومنظرناها يبقى وحش واية يعني كبر دماغك وواجه المشكلة مهما كانت المشكلة انت ربنا اداك قوة ارادة كبيرة جدا جواك

اقولك حل بسيط
في بداية الكلام امام الناس شد بطنك دة انا بجربه لما ببقى بكلم ادام ناس كتير مثلا في لقاء مفتوح فيه عدد كبير وفي الاول الواحد بيحس برهبة بشد بطني شويه لجوه بحس براحة داخلية
بعد دقيقة بحس انى عايز انطلق واكلم وبمكن افضل اكلم بالساعة لدرجة ان المشرف على اللقاء يطلع يقولي كفاية كدة
يا جماعة والله والله هو الرهبة بس في الاول المهم انت اكسر الحاجز الاولاني دة ما تقلقش انه يحصل حاجة هاتعرق مش مشكلة هاتتلغبط في الكلام عادي جدا بعد شوية هاعبر عن نفسي بطلاقة
الرهبة الاولانيه دي شيء موجود في كل البشر يعني اي حد هايتحط في مكانك هايعرق بردو شوية وممكن يتلغبط عادي جدا
سيبك من الادوية المهدئة ولا تاخد دوا للحاجات دي واعمل تمارين عضلات البطن جربها وهاتلاقي فرق كبير جدا
روح احفظ قران ضمن مجموعة كبيرة روح اتمرن اي تمارين رياضية انزل صلي بالمسجد واتعرف على الناس واتكلم في وسطهم سلم عليهم واختلط بيهم
زور اهلك وخالتك وعمتك وخالك واخوك واختك مش مهم تكلم كتير اسال بس عن حالهم هاتحس ان الحال اتغير مارس حياتك كأي انسان عادي ومش ضروري تكون رغايي يعني علشان
تعجب الناس وفي الاخر تفتكر الخجل وحش دة اوقات كتير اوي الخجل بيبقى شيء كويس جدا جدا

انزل واختلط مش مهم تتضايق انهاردة او بكرة او اسبوع بس لا اعلم حل لاي مشكلة الا بالمواجهة اخويا جه قالي انا مش هاعرف اكلم ادام القاضي وسمع بس بيت شعر
ومن يهاب صعود الجبال يعيش ابد الدهر بين الحفر

وحل مشكلته بيها لان عرف ان المشكلة دي مش مشكلة هى بس وقت وهاتعدي

كرر الاية دي كتير بينك وبين نفسك

قال تعالى " رب اشرح لي صدري ويسر لي امري واحلل عقدة من لساني يفقهوا قولي " صدق الله العظيم


الحل الاكيد واجه نفسك واتلغبط مرة واتنين وتلاته وعشرة وعشرين وفي الاخر هاتلاقي الحل هو بين اديك انك تكون اجتماعي وبس

الخلاصة في ارقام

1- صلي بالمسجد جماعة حاول تأذن المسجد وقت الاذان بيبقى فاضي حاول تأذن لا مش تحاول اذن وعلي صوتك واسمعه وهو بيتردد في انحاء المكان بالله اكبر الله اكبرر من خوفك ومن قلقك

2- شارك في مجموعة لتحفيظ القران واختار اكبرر المجموعات عددا واحفظ واتلغبط والشيخ هايصححلك عادي جدا يا جماعة الكل بيتهته وبيتلغبط وبيعرق

3- اتصل حالا بخالتك وخالك وابن خالتك وعمك واختك واخوك وصديقك اطمن عليه وقوله اخبارك اية طمني عنك انا عايز ازورك

4- تذكر انه مش لازم انك تكون كثير الكلام الكلام كترته مش حلوة

5- اقضي حوائج الناس اسأل والدك او والدتك او خالتك او عمتك او عمك او خالك محتاجين حاجة تعملهلم تروح الجهات الحكومية تدخل وتتكلم وتطلب وتامر وتنهي

6- المواجهة اي شيء تخاف منه اعمله بدون تفكير ولو احرجت قول كويس انا فاضلي كمان 10 مرات احراج والمشكلة دي هاتتحل تماما

7- ابتسم دائما حتى وان تعثرت كلماتك قول ومن يهاب صعود الجبال يعيش ابد الدهر بين الحفر

8- اكثر من قول هذه الاية قال تعالى " رب اشرح لي صدري ويسر لي امري واحلل عقدة من لساني يفقهوا قولي " صدق الله العظيم كررها كتير

9- الموضوع مش ثقة في النفس ولا الكلام دة الموضوع ومافيه هو اي شيء مش متعود انى اعمله بيكون له رهبة باكتساب التعود على الموقف دة تتحل المشكلة ان شاء الله

10- خليك اجتماعي شارك كل من حولك في مناسباته قوم واتحرك وتذكر مش لازم انك تكون رغاييي كثير الكلام مش لازم تكون رغاييي

وفي الاخر انا اطلت عليكم بس دة رأيي البسيط في المشكلة اللى انا شايف انها اصلا مش مشكلة واختم بكلمات للامام الشافعي رحمه الله :

وجدت سكوتي متجـراً فلزمتـه إذا لم أجد ربحاً فلست بخاسـر

ما الصمت إلا في الرجال متاجر وتاجره يعلو علـى كـل تاجـر منقول

المصدر: نفساني

منقول من منتدى ????? النفسي

شكرًا أخى على هذا النقل المميز ،،

شكرا أخت نوفا

نقل رائع ومفيذ

سلمت يمناك