قصة مضحكة .. خالي ومنتداه الالكتروني

[Lady sara]

قصة مضحكة .. خالي ومنتداه الالكتروني

مساء البرد ومساء الفروات
(س/ ما جمع كلمة فروة ؟ )

- القصة ذي اللي أطرحها لكم الآن (الله لا يشغلنا ألا بطاعته بس)
طيب أنا جاني نقد كبير من الإدارة يقولون لي :
(لا تكّب كب من هالمواضيع ، ترى تعبنا وحنا نسلك لك)
---> تعالي تعالي شفتك سجى أنتي و الدلخ صفوّا جنبي
عموماً ، مهما كان ومهما صار راح أسير رغم العثرات والنكبات والصرعات
---> ما النكبة ألا وجه مقلع إذا أرسل لك رسالة خاصة -تتنافض-

-القصة فيها عدة شخصيات كثيرة وراح أمثلهم بأسمائهم الأصلية
(لأنكم ما تعرفوني ولا تعرفونهم ولا راح تعرفون ولا راح تعرفونهم أصلاً)
الشخصيات هي : أنــا ، فاطمة(أختي) ، عزوز(ولد خالي) ، هند وعائشة(بنات خالي)
جــنـى (بنت خالتي) ، أمي وخالاتي ، خالي (الأساس) .

- كنا مسنترين بالصالة وكل واحد منا متسدح ومتبطح ومعّرط بجواله ويقلب بالواتس،
وخالي يسمع للأحسائي (جوك خالي أهنئك عليه) هههههههههههههههههههههههههههههههههههههههههههههه
قمّز(قمز مو قفز ركزوا) ، قال لنا : يا عيال أبي افتح منتدى مثل هالعالم والناس
وهذا كان عام 2013م ، وقت موضة المنتديات خصوصاً برمضان ،
مدري من قال لهم أن الابتوب ما يشتغل ألا برمضان ؟
قال خالي : تعرفون أنتم يا الوراعين للمنتديات ؟
انا ناظرت عزوز قلت له بعيوني طبعاً وهو رد علي بعيوني (مالكم شغل عاد) ،
أقول له : ياخي خالي وش وضعه وكيف بيفتح منتدى ذا ؟
وعزوز يقّزني بعيونه : أنت خبل ترى خالي تاجر لو يبي يفتح شركة إتصالات ..
كل ذا كان بدون نطق وكلام ..
(بسم الله علينا من العين والحسد) ..
عاد قبل كان اللي يفتح منتدى ووووووييين
هذا كأنه يملك أرض على شارعين
اتفقنا مع خالي وخلاص بنقدم على استضافة مساحة إلكترونية ونعمل منتدى ،
وقدمنا على استضافة فعلاً وجهزنا المنتدى الغبي ذاك تعرفونه
اللي يجي بالأرزق والبنر (vbulletin) ، والله يا هو غثيييييث
كنا دجاج والله بالتصميم ، الواحد يالله يعرف للرسام تبيه يعرف للفوتوشوب
وقلنا لازم نجهز لنا كادر إداري ما يصلح كذا (ادعس يالمؤسسة) وجمعنا بنات خالي واختي وبنت خالتي ههههههههههههههههههههههههه
يا حليلهن البنات حقات منتدى صدق ،،
اجتمعنا اجتماع سري وعاجل (كان قروب واتساب بعد)
وقت ما كان الواتساب (صور العرض فيه على شكل مربع مب الحين دائرة)
واتفقنا من تكون نائبة المدير والإداريات والتخبيصات ذي
(حاط يدي على وجهي وأنا اكتب هالقصة)

فتحنا المنتدى وابتلشنا بالستايل نبي استايل زين ،
رحنا لم قوقل ونكتب بالبحث (دايزين) ههههههههههههههههه ونبحث عن منتديات التصميمات ، ولقينا وحدة مبدعة صراحة وما قّصرت معنا بالسعر
ولو أنها جلدتنا شوي بس ما قصرت
ورتبنا الأقسام (القسم العام،قسم النساء،قسم الإسلام)
قسم الإسلام ماشاء الله (كنا ننافس هيئة كبار العلماء)

- المشكلة المنتدى ما كان فيه ألا حنا بس من عائلة وحدة ،
وكل شوي ننرسل بالقروب اللي بالواتس ، فلان قم رد على موضوعي
ههههههههههههههههههههههههههههههههههههههه
خير إن شاء الله

- والردود كانت ، تقبل خالص التحيا والأمنيات
(والله حسيت بالغباء جداً وأنا أتذكر هالموقف)
ولا قسم الإدارة لا يفوتكم ،
ههههههه كنا نجتمع في موضوع ومثبت بعد
-مثبت ليش بالله؟ يالله الأعضاء اللي بيشوفونه والمشكلة قسم الإدارة مغلق ما
يشوفه ألا الإدارة نفسها هههههههه-
وكنا نتناقش بالموضوع بشكل رسمي ، وبالقروب نتناقش ب هبّال
-الحمدلله والشكر بس-
ولا المواضيع اللي كلها نسخ ولصق ، والصور اللي عليها روابط وكنا نضللها بفرشاة الرسام ذيك الغبية اللي كأنها بخاخ أبيض
- كنت أصحي أختي من نومها ، تكفين قومي ردي على موضوعي ،
ولا أقول لها ليش ما ثبتي موضوعي ها ؟
(مع أني أقدر اثبت موضوعي بنفسي لأني مدير)
الزبدة أننا أفلسنا وخسر المنتدى وقفلناه (أبركها من ساعة)

سقى الله أيام مضّت ...

اذا عجبكم الموضوع اتمني تقيموني زر التقيم علي شكل ميزان بالأسفل

المصدر: نفساني

[(الشمالي)]

المنتديات في ذاك الوقت كانت كل اللي نعرفه في النت هو و الماسنجر هوتميل ..اما اميل Yahoo فكان للأجانب ومانعرف احد من العرب يستخدمه😅

[Lady sara]

صح كلامك مشكور علي ردك

[* لـولـيـتـا *]

واضح ان القصه مو لكم
شكلك نقلتيها لانه مو اسلوبك
ومكتوب بلهجه مو لهجتك
وبصراحه ماتضحك كميه من الدلاخه فيها
ماقصدك اقصد اللي كتب القصه