مهم : علاقه الرهاب الاجتماعي و مشاعر الذنب / العار / الوحده

مهم : علاقه الرهاب الاجتماعي و مشاعر الذنب / العار / الوحده

السلام عليكم ورحمه الله وبركاته

حبيت اكتب هالموضوع عل وعسى اني يارب اقدر اساعد او افيد اي احد وحاب بالبدايه اني اقول " انا مو دكتور ولا اختصاصي ولا ادعي الحقيقه المطلقه "

اخواني كثير منا تصيرله مواقف بالحياه سواء كانت بالطفوله سواء كانت بالمراهقه ولا لما يكون كبير والمرض العقلي كمرض الجسم لايختلف عن بعضه وفي بينهم اصلا
ارتباط مباشر الجسم مع العقل واهي اذكر بالمقوله اللي تقول ( العقل السليم في الجسم السليم ) وممكن في اي وقت يصير ! ويمكن مجتمعنا شوي متحفظ بخصوص هالامراض لكن الحمدلله
قاعد يزيد الوعي اكثر واكثر وملاحظ فيه انتشار واسع صارو حتى المشاهير يقولون والله ان صار فيني اكتئاب او صارت فيني اعراض او غيره مع ان نجد ان بامريكا والدول الاوربيه فيه احصائيات
وارقام كبيره بالامراض العقليه وما تجد احد يستحي ان يقول ان فيني كذا وكذا ولو حبيت تدش اليوتيوب راح تلقى ان فيه ناس يطلعون ويقولون عن تجاربهم بكل اريحيه
المقدمه بس عشان اطمنك شوي اذا كنت حديث المرض او تحس باعراض او غيره وما تفكر ان الموضوع حجمه كبير لان ببدايتي مع التعامل معاها حسيت بالذنب والفشله
فمابيك تدخل اب هالدوامه وتنتبه عل هالشي.خذا الموضوع مني 3 سنوات من لما كنت متصفح لهذا الموقع وبعدين صرت عضو فيه وانا اتشرف بالكل ولقيت نفسي مجبر ادبيا اني
ارجع واكتب هالموضوع نفس ما قلت فوق عل وعسى احد يستفيد.


بالبدايه فيه دكتور اسمه ديفيد هاوكينز له كتاب معروف اسمه ( السماح بالرحيل ) انصح اللي مهتم ان يقرى الدكتور هذا الله يسلمكم صنف مراحل الوعي عند الانسان سوا جدول وقال يا جماعه هذول مستويات الوعي وكل وعيي وله رقم الوعيي بشكل عام قلت عنه قبل يعني مثلا لما تقعد مع احد مثقف ومع ثاني ما عنده لا ثقافه ولا علم ف تلاحظ ان نظرتهم الاثنين للدنيا وللمواضيع مختلفه وكل انسان له وعيي خاص فييه، ديفيد هاوكينز صنف الوعي من درجه صفر لي درجه 1000 وعلى كلامه درجه ال 1000 هذا وعيي جدا عالي ماكو احد وصله ويدعي انها درجه الانبياء ( ما نبي ندخل بالدين ) بس اللي ابي اوصله ان كل انسان له وعيي وهالوعي يتطور بتطور معلوماتك والافكار المخزنه بعلقك اللاواعي اللي انت طبيعي تستعملها يعني مثلا لما يكون وعييك الغضب راح تلقى الشخص كله غضبان ودايم عصبي وهكذا

العقل الواعي اهو عقلك اللي تفكر فيه عقلك اللاواعي اهو اللي فيه البرمجه ويتحكم مثلا بنض القلب ووظايف الجسم وخل ناخذ مثال مثلا انت الحين لما تبي تتعلم تسوق سياره بالبدايه راح تركب وعقلك يفكر شلون تمسك السكان وتدوس البانزين وشلون تمسك القير وكل هالامور مع الوقت خلاص المعلومات تخزنت بعقلك اللاواعي وصار اهو طبيعي تدخل السياره تشغلها تسولف بالتلفون ويمكن قاعد تاكل شاورما بعد وما تدري شلون وصلت انت سقت السياره : )


المهم ان سلم الوعي هذا اللي اهوه نفس ما قلنا من صفر لي 1000 طبعا داخله مشاعر اهمها الحب / السلام / الشجاعه / الحكمه / القوه الخ. راح نلقى ان اقل نوع وعيي اهو وعييي العار !! وفوقه شوي راح نلقى وعي الشعور بالذنب ! هذول المشااااعر اخوااني جدااا قويه!

هذي المشاعر خبييثه وصعببب انك تصييدها تييك ساعات من موقف ولا شي صار معاك بالطفوله ولا وانت كبير شي حسيت فيه بالذنب كبير او انك متفشل حيل وان شلون صار واول ما تكبت هالمشاعر تتفاقم عندك المشكله انا خذت مني 3 سنوااات لين اكتشفتها من موقف شي تافه ( ما عرفت اخذ حقي بالدوام وحسيت بالفشله وانتهى !!! ) هذي المشاعر تدش عقلك الباطن وتعشش فيه !! هذي المشاعر مرتبطه ارتبااط كلي بالرهاب الاجتماعي والوحده لانها تدخل عقلك الباطن وتعشش فيه وانت او احنا بشكل عام نحب نقول ان كل شي تمام واذا صار شي غلط او موقف نقعد نطنش المشاعر ونسحب عليها وبعدها تنبني الافكار عندنا والمعتقدات كلها عليها عل مشاعر ( العار او الذنب ) ويصير تراكمات مع الوقت كلها بمخككك تقدر تبحث عنها بالنت اسمها مشاعر العار باليوتيوب او اللي حاب يبحث عنها بالانقليزي Toxic Shame

المهم انها من تدخل عقلك اللاواعي وتعشش فيه وتبني وتبني افكارك عليها انت لما تواجه الناس او تقعد بينهم تحس نفسك صغيير تحس انكك مو قد انك تقعد وياهم تحس انك حاس باحساس الذنب او العار صارت تقولك ان الناس الحين قاعد يشوفون ويعرفون انك مذنب او عندك هالشي اللي يفشل العقل اللاواعي ماراح يقصر راح يشتغل نفس ما يركز عل نبض القلب ووظايف الجسم راح يقولك انت قاعد بمكان مو مرتاح فيه تبدى ايدك ترجف عيونك تتشنج وباجي الاعراض اللي تحوشك ( اللي اعرفها عدل )


انا ما اقول وقف علاجك او لا تسوي علاج سلوكي معرفي او اي شي من هذا القبيل ولا اقول ان اهيه السبب الرئيسي بالرهاب الاجتماعي بس الاخوان اللي حاشتهم فجآه او اللي فيهم من زمان احتمال اكبير من هالشي مع العلم ان خذت مني 3 سنوات عشان اكتشف المشاعر هذي مع اني اخذت ادويه ورحت علاجات ومحد قالي عن هالشغله ما الوم احد لانها ما تكون واضحه حتا حق الشخص نفسه اهي تعشش بمخك ولما تقعد بين الناس تحس انك متفشل وانت مالك شغل وانت اقصى شي سويته بحياتك انك كنت بدوس عل نمله واخر شي انتهبت عليها وقتلها اسف ما اعيدها مره ثانيه بل حتا يمكن بابلو اسكوبار ( اكبر تاجز مخدرات ) ما حس بهالاحاسيس : )

بالبدايه خذا الموضوع مني مجهود شخصي كتب تغيير نمط حيات قرايه كتب ممارسه رياضه تجييك عل فيتامينات الجسم وتغيير روتين حياه كامل ونوم واستمريت عليها وفوق هذا عرفت ان علاج الرهاب الاجتماعي انك تواجه وفعلا قعدت اواجه اخذت روحي ( مو مع شخص عشان يخف التوتر ) لا بروحي ورحت اواجه الامور مع الوقت التوتر ليلحين موجود والاعراض موجوده قعدت اسجل بنوته وانا بنص الناس شنو المشاعر اللي احس فيها عادي مثلا اكتب ( * اخاف ان يصير شي * اخاف ان احد يغلط علي *اخاف ان ما اعرف اتصرف * اخاف ان احد يشوفني * اخاف ان احد يشوفني متوتر ) وانا قاعد ارد عل هالاشياء قعدت اكتب كل هالملاحظات مده شهر كامل وارد عليها ساعات لما اكون بنص الناس ( طبعا تهدي خصوصا لما تزف نفسك بالرد ههه ) تحت هالنقاط احط الرد او لما ارجع البيت ارد عليها رد منطقي شوي شوي فهمت المشاعر وصلت ان سبب المشكله اللي يوم ما صارت المشكله اللي قلت عنها فوق.

حبيت يااخوان اضيف هالمعلومه ان الواحد يبحث داخله ويروح ورا شوي ويشوف متا صارتله هالحاله ويفهم مشاعره حزتها يمكن تكون مشاعر ذنب او عار او شي جذي يمكن مثلا احد ( بدون احكام ) كان له ماضي بالمخدرات او شي يعتقد ان مو زين بل حتا يمكن مثلا وحده ما تزوجت وتحس بالذنب واهي مالها شغل !!! وتستمر هالدوامه !! بالنهايه راح نوصل حق اعراض الرهاب الاجتماعي وراح نوصل حق الوحده لان هالمشاعر يا اخون راح تحسسك كل لحظه انك مو قد الموقف وانك صغيير تخلييك تتقوقع جدام الناس حتا بتصرفاتك بل حتى مخي راح يعطي اوامر حق ايدك ترجف او نبضك ولا شي

كتبت هالموضوع عل وعسى افيد احد عل اقل يعرف اساس هالمشاعر ويبلش يتعامل معاها طبعا في باليوتيوب جم فيديو عن هالشي وتقدر بعدها اتابع مع دكتور او اختصاصي يحلك هالموضوع تاخذه من جذوره لان متجذر داخل المخ وبالنسبه لي 3 سنوات والعقل يتبرمج معاها ف يبيلها وقت شوي عل ما تخلص بس ينفع كبدايه اذا تاكدت من هالشي نفع معاي ( اني اكتب الحدث اللي صار كامل بل ونفس معاي ان يوم قعدت اقول حق جم واحد من ربعي ثقه احس وايد ارتحت وكان حمنل عل ظهرك مشاعر فشله ومشاعر ذنب وانت مالك شغل بالسالفه ) ونفعني لما اكون بالموقف بين الناس اقول واذكر نفسي ان ماله داعي ان ولو واحد بالاميه اني احس اني متفشل ولا مذنب وفي فرق بين شخصيييي انا وبيين مشاعري هذا شي وانا شي !! وساعدني وايد اني اقرا كتب


اسف عل اطاله واسمحولي اذا ما عرفت اوصف واكتب عدل ماعندي خبره اني اكتب مواضيع وشكرا : )

المصدر: نفساني

حاب اضيف ان رقم وعيي الفشله ( العار ) والذنب 20 من 1000!! يعني لك ان تتخيل لما تكون بموقف او حدث اجتماعي جسمك قام يتقوقع حاس بالدنب وبالفشله وجسمك يخسر طاقته !! وتبلش معاك الاعراض ولما انت نفسك ما تكون واعيي عقلك عل وعيه هذا قاعد يعطي اشارات حق جسمك وتبلش معاك الاعراض.

وحاب اضيف امور ممكن تساعدك ( بعطيك لمحات وانت ابحث بكل موضوع وسو واجبك عل قولتهم :) ) :
- سجل يومياتك وخصوصا مشاعرك بالتحديد واكتب فضض كل شي مو دايما راح تقدر تقول اللي تحس فيه بس لما تكتب يومياتك راح يقل التوتر عندك وهم انك اطلع مشاعرك اللي تحس فيها وتقبلها مهما كانت !! لا ترفض مشاعرك برفضك حق مشاعرك تزيد مقاومتك حقها
- الرياضه ضروريه ( يفرز جسمك هرمون الاندرفين طبيعي ) يريح الجسم واصلا راح تحب انك تسوي رياضه عشان يفرزلك هالهرمون اللي يقلل التوتر ويريح الجسم وهم يعدل الجسم ( وسولك خطه حق جسمك ) يقوي ثقتك بنفسك وراح يفيدك
- تجييك عل الفيتامينات وكثير منا للاسف عنده نقص فيتامين د اشتغل عليه !!
- النوم ( اهي دايره مفرغه انت عندك قلق او توتر وبالليل ما تنام ولما تقوم من النوم وانت مو نايم عدل يحوشك ارهاق ويخليك متوتر ) وهم ترجع بالليل ما تنام ودوامه مستمره النوم طبعا ضروري واقرا شلون تعدل النوم وتقدر تحصل عل 7 ساعات
- في فرق بينك انت ك شخص وبين مشاعرك ! يعني لما تكون متوتر مو انت متوتر انت شخص وفيك احساس توتر خل اشرحها زياده هممم ( نفس مثلا انت بحيره هاديه والموج اللي اييي اهو المؤثرات اللي تحوشك موجه عاليه موجه نازله بس ما يغير من البحيره شي ولا يغير من شكلها ( دش قوقل الحين وشوفلك احلى بحيره وشوف شكلها شلون ساكنه واحفظ هالصوره بقلبك ولما تطلع تخيل روحك انها بداخلك والاحداث اللي تصير اهي تحركات الماي يا موج او لما تقط صخره بالماي تصير تموجات وبعدها يرجع الوضع ساكن )
- تمارين التامل تفيد وايد يا اخوان !
- قرايه الكتب ( تزيد الوعيي عندك ) وانصح فيها بقوه وانصح بالكتاب اللي قلت عنه فوق ( السماح بالرحيل ) وانصع بقوووه بكتاب ( انت البلاسيبو ) وفي كتب كثير

وشكرا

ملاحظه : هم بعد لما تحس بالذنب والفشله ان صار فيك هالشي تزيد التراكمات اللي عل التراكمات القديمه.

يعني لما تتعامل ع الناس وخصوصا اللي ما يعرفونك لا تعاملهم عل اساس مبدأ النقص اللي عندك ( حاول تتخيل صورتك انك واثق او تحامي اخد ان عنده ثقه او تخيل انك مشهور ) الناس راح يتصرقون معاك على الاساس اللي انت قام تفكر فيه يعني لو انت بمخك ان انت فيك نقص ومو واثق مخك راح يعطيك الصوره اللي انت تبي تشوفها ويتحقق الشي اللي انت قام تفكر فيه وقيس عل هالشي لما تفكر ان الناس حاطينك انت اكبر همهم وان ماكو غيرك او ما عندهم اشغال ولا عمدهم شي لاعين فيه غيرك !! : )

- الناس كلهم كلهم عندهم توتر وقلق وخصوصا بالمواقف الاجتماعيه بل حتى بالمجمعات وبكل مكان بس في مهارات تعلموها وصارو احسن مع الوقت وقادرين ان يسيطرون عليه ( يعني انا خلال شهر اول طلعه لي غير عن طلعتي بعد شهر ! في مهارات وشغلات وامور تبني عليها )

- تقدر. تسوي بحثك وتتاكد من هالمعلومه طبعا احنا ملوك قووقل ( مع ان بقولك شيل الاهميه من المشكله وتقل كثير !! ) المهم اكتب ان هل للرهاب اجتماعي يمكن علاجه بالانقليزي والجواب نعم قابل للعلاج !!

- مهما كانت حالتك والدرجه اللي واصلها ودرجه الحزن اللي انت فيها لا انسى ان اللي قاعد يكتب هالكلام سنه ونص داخل غرفته ! ولا تنسى ان حتا ما قدر يكلم ابوه واللي بالبيت ( بس بعطيك دفعه معنويه 😉 )

يا رجل .. حاولت وما في فايده .. انا مشكلتي مع الناس .. اخص اقربائي ما يحترمون مشاعري ولا يهتمون لي .. ولا كأني موجود في هذا العالم .. اربعين سنة حرمان من السؤال .. كبت وظلم وتهميش وتجاهل ..

اريد كتاب كيف تتعامل مع الاخرين يقرؤه هؤلاء

نصائح رائعه ماشاء الله يعطيك العافيه أخوي

المشاركة الأصلية كتبت بواسطة معاليأس

يا رجل .. حاولت وما في فايده .. انا مشكلتي مع الناس .. اخص اقربائي ما يحترمون مشاعري ولا يهتمون لي .. ولا كأني موجود في هذا العالم .. اربعين سنة حرمان من السؤال .. كبت وظلم وتهميش وتجاهل ..

اريد كتاب كيف تتعامل مع الاخرين يقرؤه هؤلاء

ياخوي انت مو محتاج الناس ولا اي احد عشان تحس بمشاعر او بشعور حلو او بحياه طيبه
ما عمرنا راح نقدر نغير الناس الواحد يغير نفسه والناس ولي وحواليه راح يتغير ولي ما يعجبه شخصك انت ما تبيه
وعندي قناعه ان الناس وانا منهم كذلك فينا الشي الزين والشين كل اللي علينا نبرز الشغلات الزينه والناس هم راح يبرزونلنه هالشي
الواحد يركز عل نفسه والامور الخارجيه كلها بتتغير ( جرب بنفسك )

وقال سبحانه: {مَا أَصَابَكَ مِنْ حَسَنَةٍ فَمِنَ اللَّهِ وَمَا أَصَابَكَ مِنْ سَيِّئَةٍ فَمِنْ نَفْسِكَ} [ النساء: 79] / إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ [الرعد:11]


اذا الواحد يبحث عن حله من الناس وان يعطونه الامان والوناسه وان يتصرفون عل هواه هذا قاعد يمشي ورا حلم
وللعلم فيه ناس يحبون يشوفونك بوضعك المنكسر وفيه للاسف ناس وايد عندهم اظطراب الشخصيه السامه حتى يمكن اقرب الناس لنا
يعني اهو يزعل لو شافك بخير ( وبالعكس عاجبه وضعك انك اتم مثل ما انت ف لو تييب جائزه نوبل هم راح يقولك انك مو كفايه وان ارجع نفس ما كنت ويمكن بعد يحاربك )
انت لا تدخل بهالصراعات وتكبر المشاكل نفس ما قلنا علينا من نفسنا ونحاول والله الحافظ

كلام جميل .. لكن انا لما اكتشفت حقيقة الناس واكتشفت انهم ما يعيرون اهتمام فما صار لي نفس اصلح من نفسي لاني اذا اصلحت نفسي سأعيش معهم في خداع وسأذل نفسي لهم .
طبعا انا حاولت اعالج نفسي لكم دون جدوى لكن يوم بعد يوم يزداد كرهي للناس .
بعدين كيف مش محتاج للناس!

عندي مدونة اسمها انياب الخوف
aho75.blogspot.com

المشاركة الأصلية كتبت بواسطة معاليأس

كلام جميل .. لكن انا لما اكتشفت حقيقة الناس واكتشفت انهم ما يعيرون اهتمام فما صار لي نفس اصلح من نفسي لاني اذا اصلحت نفسي سأعيش معهم في خداع وسأذل نفسي لهم .
طبعا انا حاولت اعالج نفسي لكم دون جدوى لكن يوم بعد يوم يزداد كرهي للناس .
بعدين كيف مش محتاج للناس!

عندي مدونة اسمها انياب الخوف
aho75.blogspot.com

قصدت ان محد لازم يحتاج احد ( عشان يحس بمشاعر وشعور طيب او ان احد يخليك سعيد ) هالشغلات الواحد يشتغل عل نفسه والامور الزينه باصير باذن الله والناس فيهم الزين والشين او بالاحرى نفس ما قلت كل واحد فيه جانب سيء وزين وانا اولهم ولو بشوف الناس كلهم مو زينين بتصير الحياه كلها سوده : )

عموما شكرا ياخوي عل المشاركه وراح ادخل اشوف المدونه