الى كل من اجرى عملية التدبيس للعصب السمبثاوي

مستر احمرار السفرية كلها تكلف حدود 20,500 ريال

بسم الله

انا مشيت من السعودية الى القاهره يوم السبت 7 صباحا ووصلت القاهره 9:30 صباحا لقيت السواف ووداني الفندق

التذكره 1500 ريال الخطوط السعودية والفندق 100 دولار الليه شاملة الفطور وانا جلست من السبت الظهر الى الثلاثاء الساعه 7 صباحا ومشيت للمطار عشان ارجع السعودية يعني الليله ب 375 ريال واضربها في ثلاث ليال

العملية 4500 دولا

واذا تبغى واحد يستقبلك ويوديك ويجيبك تزود 200 دولار

وبس الاشياء الثانية حقت غداءك وعشاك في الفندق

يعني كلها تقريبا 20,500 ريال

طبعا وصلت و استقبلني واحد لاني دفعت 200 دولار زيادة على العملية و وداني الفندق و جلست لين اليوم الثاني اللي هو يوم الاحد و جاني السواق الساعه 11:30 الظهر ووداني المستشفى و دخلت و اخذوا اشعة و تحاليل ( طبعا الاشعة و التحاليل ما تدفع شي لانها من ضمن ال 4500 دولار حقت العملية ) جلست في غرفه لين الساعه 7 المغرب

دخل الدكتور و قالي اللحين نسوي العملية و اعطيته ال 4700 دولار وودوني لغرفة العمليات و اعطوني ابره في ايدي

صرت بعدها خارج التغطية ولا صحيت الا بعد العملية الساعه 9 او 10 مساء وجلست لين الساعه 6 الصباح و مشيت الفندق طبعا اعطوني ادويه و مسكنات و جلست الى اليوم اللي بعده يعني الثلاثاء و رجعت السعودية

باكمل باقي التفاصيل لاحقا

معليش مشغول الحين

تكفا رد علينا

يا اخواني انا ما صار لي كم يوم من يوم سويت العملية اصبروا علي شوي و راح اعطيكم كل النتائج بالتفصيل الممل

ما لكم هم بس صبروا علي شويه

الله يعطيك الصحه والعافيه

السلام عليكم

شفتوا كيف , انا قلت لكم اصبروا علي شوي عشان اتأكد لكم من النتائج

انا صار لي الان 13 يوم من العملية يعني تقريبا اسبوعيين

تذكرون يوم قلت لكم اني فمي جاف , طلع ما هو بجاف انا بس كنت اوسوس

صراحه اول اسبوع بعد العملية كنت زي المهلوس كنت اراقب نفسي و جسمي اي شي يصير فيني اقول بس

هذا بسبب العملية , تخيلوا قبل ما اسوي العملية كنت ابحث في النت عن اعراضها الجانبية بشكل عادي لكن بعد العملية صرت ابحث عنها بشكل مفصل و دقيق و ابحث عن كل شي من قوة الوسوسه ما ني مصدق اني سويت عملية عشان احمرار الوجه و كان اي شي يصير فيني يعني مثلا ( عطش , زكمه , رجفه خفيفه , برد شديد , .....)

كنت اقول هذا بسبب العملية و مثلا قريت في احد المواقع الاجنبيه ان العملية تقلل ضربات القلب بعدها صرت اذا رحت انام اقول في نفسي شكلي قلبي بيوقف انا يمكن اموت في اي لحظه ههههههههههههههههههه

هذا و كله ما بعد جربت هل اختفاء الاحمرار ام لا

المهم , وقررت اني ابغى اشيل هذي الدبابيس و ارجع زي اول , و اتصل مباشره على الدكتور حسام واشرح له الوضع قلت انا فيني جفاف في الفم و اعشط كثير وصدري دايما بارد و ضربات قلبي صارت بطيئه و احس اني باموت

قال لي لا لا لا هاذي كلها اوهام و خزعبلات و وساوس نفسيه عشانك سويت العمليه قبل كم يوم خذلك حبوب نفسيه عشان ترتاح , واذا عاوز نشيلها لك بتكلف نفس تكلفتها 4500 دولار , بس حرام عليك اصبر على الاقل كم شهر وجرب وشوف و الاوهام هذي راح تروح مع الايام

المهم , سكرت الاتصال وقلت في نفسي فعلا احس اني جالس اتوهم اني عطشان وباموت و و و و و و

المهم مع الايام حالتي تحسنت و الحمدالله و فعلا لا يوجد عشط زائد او جفاف في الفم او ضربات قلب بطيئه

النتااااااائج :

ولله الحمد قابلت اكثر من موقف كان يفترض ان وجهي فيه يصير زي الطماطم الحمراء والحمد لله ولااااااا شي

هههههههههه صرت قوي وجه , صرت انافخ و اهايط على العالم هههههههههه

لكن الخوف الداخلي لا يزال موجود

هذا الشي اللي مفرحني في العملية ان الاحمرار اختفى ولله الحمد لكن اللي مضايقني هو جفاف اليد

يا ناااااااااااااااس عذااااااااااب احس اني فقدت شي جميل لكن حسبنا الله ونعم الوكيل صرت مدمن على اللوشن و المرطبات حقت اليد , لازم كل 5 او 10 دقائق تحط لوشن

والله يعينك اذا كنت تمسك ورق كثير راح تعاااااااني

وفيه شي ثاني مضايقني بس لين الحين ما تأكدت هل هو بسبب العملية او لا وهو جفاف العين

بس لين الحين مدري هو جفاف في العين ولا برضوا لا ازال اتوهم لاني اذا حطيت قطره في العين احس براحه نفسيه و عيوني ترتاح شوي

بالنسبه للعرق الزائد الاجواء الايام هذي معتدله فلذالك لا استطيع ان احكم الا في وقت الصيف عشان اشوف هل هو يسبب قلق ام لا , لاني سبحان الله المواقف اللي يفترض اني احمر فيها , وجهي لا يحمر لكن احس بعرق في بطني و اسفل ظهري ورجولي و اتوقع انه بدل الاحمرار والعرق اللي من المفترض انه يطلع في وجهك يطلع في بطنك او ظهرك او رجولك

فقط هذي هي النتائج

السؤال ؟
هل انا راضي عن العملية ؟

الجواب : صراحه حتى الان الحمدالله انا راضي لكن برضوا انا انتظر الصيف عشان اشوف العرق التعويضي

لان في اليوتيوب ناس اجانب يشكون منه بصراحه ويقولون انه مسبب لهم قلق واحراج

لكن الحمد الله انا الان صرت اروح اماكن وانا مطمئن ان وجهي ما راح يحمر و ياربي لك الحمد

لكن ارجوكم اللي سمعته ان مو كل واحد تنجح معه العملية يعني في ناس سووها ولا راح الاحمرار او انه خف شوي

فلذالك كل واحد و حضه و يا رب اشفني واشف جميع مرضى المسلمين

واي سؤال انا جاهز

الحمد لله اجريت العمليه يوم الاحد ولان ان في مصر
واسئل الله العلي القدير ان يشفيني وكل مريض امين

مبروك يالبحار

واسال الله ان يشفيك و يحقق لك مرادك وان يعطيك خير العملية و ان يكفيك شرها و جميع مرضى المسلمين

بس عطنا نتائجك و اعراضك عشان نشوف كلنا سوى

و اللي سوى العملية من زمان ارجوكم هل هناك كريم او علاج لمشكلة جفاف اليد لانها مسببه لي نفسية قلق

ابي اي حل لهذا الشي

شكرا

فيه احد تعرق ايده

صدى الذكريات ما فهمت قصدك

انا يدي ناااااااااااااااااااااااااااااااشفه ما تعرق ابدا وابي حل لهذا الشي

يا اخوي لغز ممكن تقلي متى بدت يدك تجف وتتعبك هل من اول يوم او بعد فتره من العمليه انا يدي جافه بس اشوفها الى الان عادي جربت اقلب اوراق وعد فلوس صح انه فيه اختلاف بس خفيف

السلام عليكم اصدقائي

انا سويت العملية شهر 10

والحين بشيل الدبابيس بأي طريقة

لان يدي وجسمي من الاعلى لم يعرف العرق او الرطوبة من شهر 10 وهذا سبب لي احتكاك شديد في الجزء الناشف من جسمي خصوصا عند بذل مجهود مثل لعب الكرة او رياضة المشي اتحكك كأن فيني جرب
وغيره من الاثار السلبية الكثيرة
وفوق كل هذا الاحمرار موجود

والرياضة كانت متنفسي الوحيد الحين كرهتها بسبب هالحكة

من عنده معلومة اذا في دكتور بالكويت يشيلها