يوميات المكتئبين تعال نسولف

[عيون متفائلة]

ابو نجلا هلا بك

اقصد ان الثلاث الادوية اخذتها خلال العشر سنوات الماضية. كل فترة كورس و الان متوقفة عنها لي قريب سنتين

اخر كورس كان البروزاك و وقفته بالتدريج

[كحيلان *]

المعذرة صدعت و كنت أتفرج باليوتيوب و رحت المحطه عشان آخذلي بنادول إكسترا

هلا بسمه شوفي العلل النفسيه أنا أشبهها بالحرب الضروس
و كلن و حظه في هذي الحرب إما الإستسلام أو المقاومة الأبديه و الله يعين

المرض النفسي لسوء الحظ هو كالسكري و الضغط و غيرها من الأمراض المزمنه يتطلب له العلاج مدى الحياة

[عيون متفائلة]

سلامتك ابو نجلا


تدري وش المشكلة اللي خلتني اهرب منها ما هو لأنها تفتح الشهية و تسمن و تخلي الواحد زي الفيل بالقوة يتحرك و يتعب من اقل مجهود حتى لو كان غسل ماعون

لدرجة يشهد الله كنت أفكر و اتحايل حتى ما تزيد خطواتي خطوة وحدة و أستبعد قطع المتر الواحد مو بس من الخمول اللي تسببه لا بسبب ألم المفاصل و العظام الناتج عن زيادة الوزن بحيث تحس انك تجاوزت التسعين

كل هذا ما هو سبب اني اتهرب منها لأن البروزاك ما يفتح الشهية و لا يسمن

لكن كلها جابت لي خمول و نوم عميق و كأني ميتة بحيث ما افتح عيوني باليوم غير أربع ساعات من الاربع و عشرين ساعة ما اتعداها أبد

حياتي تعطلت و توقفت

انا كنت شبه ميتة في ذيك السنين

الناس تخلق و تموت و انا مدري عنها

عشرة سنين من حياتي سقطت مني سهو

كان بإمكاني أحضر فيها رسالة ماجستير و دكتوراه مثل ما كنت أتمنى و أمسك وظيفة و أتم حفظ كتاب الله و أنجز لكن كله راح هباء منثورا في النوم اللي سببته لي الادوية

و فوق ذا يزيدون في قهري الأطباء يقولون ان البروزاك يسهر و ينشط

كيف كذا و انا من يوم ابلع الكبسولة ماعاد ادري عن الدنيا و نوم عميق

حتى البروزاك قلب معي بعكس


الحسنة الوحيدة للبروزاك عدم زيادة الوزن

[عيون متفائلة]

يا رجل كنت من شدة التعب لأقل مجهود بسبب الم المفاصل و العظام اللي نتج من الادوية و السمنة اللي سببتها لي و النوم العميق كنت يوم أسوي إنجاز ذاك اليوم و أفكر أطبخ كنت أنام و القدر على النار

هذا مثل بسيط

هذا لان الطبخة ذي استهلكت يقظة الاربع ساعات حقت اليوم و لازم انام العشرين ساعة المتبقية

الحين يوم افكر اقول ياربي الحمدلله ما انحرق البيت و صارت كارثة و انا نايمة

و المشكلة مهما تشرح للأطباء المصايب ذي يفكرونك تتكلم بصيغة المجاز البلاغي ما يصدقونك

يعني يوم تقول انك ما تصحى غير اربع ساعات من الاربع و عشرين ساعة انك تعبر تعبير مجازي انك تقصد زيادة ساعات النوم عن الثمان ساعات بساعتين ثلاث فقط

و انت ما تصحى غير الاربع ساعات و ليتك تكون فيها نشيط الا بنصف يقظة ، تمشي و كأنك دايخ لا تقدر تركز في صلاة او تفكر انك تحل مشكلة او تخطط لمستقبل او تحسن اختيار او تقرر

مافيه من ذا كله ابد

[عيون متفائلة]

و الطامة الكبرى هي جمع الفروض يارب اغفر لنا

بالله كيف لبني آدم ينام عشرين ساعة يصلي فرض بفرضه

اقلك لو اوقت الساعة او تضرب قنبلة عند راسي لا يمكن اقوم

و تخيل يوم تجمعها غير انعدام التركيز فيها لو قلنا تبي تاخذ من الاربع ساعات ساعة و نص مثلا

ما يبقى من وقتك غير ساعتين و نص

هذي وش ممكن تسوي فيها غير ان نص ساعة منها رايحة اكل و نص نظافة

عشان كذا كنت اقول اني انام عن القدر على النار

ما يمديني اجمع مقادير الطبخة و اخلطها و أضعها على النار غير نمت

غير الحركة البطيئة الناتجة عن زيادة الوزن و الم المفاصل و العظام اصير زي السلحفاة

الوقت يروح و انا أمشي و ما وصلت مافيني حيل اخطو خطوة

[عيون متفائلة]

هذا غير الإحباط و كره النفس اللي تسببه لك الادوية لا عاد تعرف نفسك و لا الناس يعرفونك بسبب زيادة الوزن اللي تسببها لك

بدال ما كنت تلبس السمول بالقوة يجي عليك الاكس لارج

انا ماكان يتعدى وزني الخمسينات و كان يضرب بي المثل بالرشاقة و اللياقة فجأة اشوف الثمانينات و التسعينات

يعني وزن بني آدم ثاني انضاف لك و كأنك صرت شخصين يتحركون سوا

و حتى يوم البروزاك ثبت وزني و ما زاده ما كان اصلا يخليني اصحصح و تزيد ساعات اليقظة عن اربع ساعات بحيث افكر اكل طعام صحي ما يزيد وزني و اسوي رياضة

ما سويت الرياضة و نزلت وزني غير بالسنتين الاخيرتين ذي يوم تركت الادوية لأني و الحمد لله بفضل الله ما صرت انام نومة اهل الكهف ذيك بسبب الأدوية

و انا متأكدة لو ابرجع لها حتى لو كان البروزاك يبي يرجع ذاك النوم الطويل لدرجة ما يمديني اتصفح و لا راح تشوفوني غير الخمول الفظيع و الم المفاصل و العظام و اصلا كل البيت على راسي بسبب مرض الوالدة بالسنتين الاخيرة بحيث انها ما تقدر حتى تقف على رجليها تسوي كوب شاهي

[عيون متفائلة]

يعني وش فيها لو اخترعوا دواء ما يخدرك و ينومك و يفصلك عن العالم

حتى البرنتلكس اللي توسمت فيه الخير و قلت انه الفرج بعد الصبر طلعوا فيه الاعضاء بعد التجربة الطوام العظام

تعبنا لكن إلى الله المشتكى

ما لنا غيرك يا الله

[امنيتي الجنة]

اختي عيون متفائله
يالله نفسي مع النوم كل حياتي نوم وتسدح
وتعب من اقل مجهود كاني راكضه الهث
صدق ياليت يطلعون لنا علاجات نفسيه مالها اعراض جانبيه كثر اللي تجينا
حرام الواحد كل حياته نوم وكسل وعدم تركيز ونسيان

كيف الحين عايشه بدون ادويه !

[امنيتي الجنة]

كيفكم اول ماتفتحون عيونكم من النوم اوصفو لي وش تحسون فيه
حاليا اكثر لحظه متعبتني

[كحيلان *]

بسمه أنتي يبغالك كورس جديد و تتابعين مع العيادة كل أسبوع هذا اللي أشوفه لأن حالتك غريبه شوي و يبغالها تكتيك محترف دام ان البروزاك جاب لك كل هذا النوم و الله مشكلة هو يمكن صح يجيب التثاوب لبعض الأشخاص بس انه يطرحك طرحة ما عاد توعين الا و أنتي ناقده نفسك و كأنك في سبات شتوي هذا شي يبغاله بيطار محترف

و أنتي صادقة و الله عندنا أطباء لا في الحكومي و لا الخاص يكرهونك في العلاج و يصير المراجع يكره حتى نفسه من شوفة النفس فيهم و من عدم تجاوبهم مع المراجع
أنا أول كورس لي في العلاج طحت في أخصائي نفسي قاللي أنت مستخدم مخدرات من شكلك يا لعنبوه قال لي من وين جاك الرهاب و الإكئتاب قلت أنا علتي خارجيه تماما عن اللي تظنه فيني قال لا أنت مستخدم ثم ضمرتها في قلبي قلت خلني أشوف وش آخرتها مع ذا المعتوه اللي بليت به بعدها طلعت من عنده و قلت توبه أجيك الله يبلاك مثل ما بلاني أنا ما دورت وراه أصلا و خذيت فكرة سيئة عن الإخصائيين النفسانيين كلهم لكن بعدها تعدلت النظرة هناك و هناك و أصابعك ماهي بـ سوا

المهم مع روحتي للدكتور و كل موعد يقولي بعطيك موعد مع الأخصائي ـ المعتوه ـ أقوله لا ما أحتاجه فكني منه الله لا يحوجني لأحد غيره

على فكرة أنا أمي كذلك مريضه نفسيا و كل أخواني و أخواتي سليمين و ورثت هالمرض من أمي فقط الوحيد اللي رماني القدر و الحمدلله على كل حال و هي أميه بحته و هي الوحيدة المريضة بين أخوانها و أخواتها خوالي و خالاتي لكنها أشوى مني بكثير تشوفينها ما تقولين فيها شي و تسولف و تآخذ و تعطي مع الأدويه أما قبل كان حالها يرثى لها

أبوي قد قاللي انها عانت في فترة من حياتها بعد زواجها و ودوها لواحد أيام الجاهليه معروف بينهم انه يستخدم الجن لكن أيام الجاهليه ما كانوا يعرفون حلال حرام و يقول أبوي لو أشوفه الرجال الحين لا أكفر فيه

سبحان الله المقدر ما منه مفر مع ان أبوي تزوج وحده ثم طلقها ثم طب في أمي مع انها مرضت عنده و لا طلقها و جيت أنا حانق على أبوي أقول في نفسي ليش ما طلقتها لأني طحت طيحة الله يسامحهم بس

الأولى اللي طلقها أبوي أشوف انها أبرك لو جيت ولدها كان ما فيني هالأمراض

الله يلعن زواج الأقارب مع انه حلال لكن لو بيدي أصدر قانون حكومي يمنع زواج الأقارب بتاتا البته

مع ان علي بن أبي طالب رضي الله عنه تزوج بنت عمه فاطمه رضي الله عنها

لكن ما في مثل زواج الغرباء حتى لو كانت صوماليه و الا حبشيه و الا يهوديه

لكن المقدر ما منه مفر و لا مهرب آمنا بالله و بالقضا خيره و شره حلوه و مره !!!

[محمد البدراني]

مسااااااااااااااااااء الخيرات

وشلونك يا الربع

اخباااااااااااااااااااركم


عيووووووووووون عاااااااااااااااالي استعينوا بالله وان شاء الله تفرج


كلنا نفس المركب يموج فينا بالامواج ولا ندري وين المرسى

[كحيلان *]

ما نقول الا يا رب تفرجها من عندك

يا حي نباك يا بو حميد

بخير أنت بشرني منك

أمنيتي الجنة بالله ضمي ولدك و لو المرض يهدك خليه حولك خليه يحس إنك أمه و حياته و الله ما راح ينساها لك

و أطلبك طلبة تفاهمي مع زوجك في انكم تروحون لإخصائي إجتماعي عسى زوجك يتفهم وضعك و تمشي الأمور بينكم

الله يقويكم جميع و يشفيكم

[محمد البدراني]

مراااااااااااااااااااااااحب بالكل

تحي وتبقى يا عااااااااااااااالي علومي الحمدالله نحمده دووووووم

بين وبينك خف الاكتئاب بس المسيطر حالة هوس شراء وفلست وانا اخوك خاصة بعد التقاعد

[محمد البدراني]

عندي ترتيب الغرفة السبح منثره في كل مكان هي شرابات الفضة تقول احد ناطل قنبلة في الغرفة

تحتاج ترتيب وخااايف اضيع شي من السبح او الشرابات هههههه لحظة نشاط بريك وراجع

[عيون متفائلة]

و الله مدري وش أرد

لكن الوكاد لي عودة بإذن الله