ساري و الغدرا

[كحيلان *]

يا ليت للشوق عندي تهْدِيَه و يهدي .

سكون النفس ,ظل امرأة معجبون بهذا

[كحيلان *]

بسبب قطوه غضبت على كل القطو

ما ادري من هو أو هي اللي تسوي ككه في الدرج ، المرة الأولى قلت يمكن حشرانه و دخلت البيت و الدرج و لا عرفت تطلع يعني بالعربي تغاضيت و سامحت ، شلت الككه و رميتها في البراحه

المره الثانيه إلا أشم الريحه و قلت في نفسي سوتها مرة ثانيه و شلت من راسي انها دخلت بالغلط و شلت من راسي إنها ما عرفت تنقز السور و شلت من راسي إنها كانت حشرانه ، الفعل متعمد و ليش ما ادري . شلت الككه و حذفتها بالبراحه

المره الثالثه سوتها و طبعا السواه هذي في أيام متقاربه ما هي بعيده عن بعض شلت الككه و جاء وقت الغضب و غضب غير محدد سويت تحديد للكل كل قط تشوفه عيني أجننه أهبل فيه حتى يقولون و يفكرون ما عاد يطمرون السور

😄😂 حتى البسه اللي خليتها تولد في الدرج و طبعا كان الوقت قيظ و رطوبه و العايله ما هم موجودين مسافرين للديره فخليتها تولد ورغم انها ما هي أليفه بس ارتاحت للمكان و ارتاحت لي و انا ارتحت لها و رحمتها كانت حامل و خليتها تولد في الدرج لين ما بدوا عيالها يخرجون أكرمكم الله فاستخدمت معها أسلوب الطرد و فهمت السالفه و راحت بعيالها لأنهم ستة أطفال و كبروا و بدوا يخرجون و أنا كنت وقتها تعيبين شوي باليالله أشيل حيلي فكيف أشيل حيل شي ثاني و شي طبيعي مثل ما البسه تطرد عيالها لما يكبرون في سن معين بل بعضهم تاكل بعض عيالها فكذلك أنا قلت دامكم تسوون كذا بعيالكم و خصوصا طرد الأم لصغارها في سن معين فكذلك أنا أطردكم لأسباب وجيهه 😂 سبحان الله يا ذي البسه أبغاها تتألفني و حاولت بس ما قدرت و سبحان الله دايما تشوفني أو بمجرد ما تقرب من الباب تتذكر الموقف و تحن و تشتاق للدخول للدرج و تشمشم و تموي ، هذا يعني إن بعض الحيوانات عندها مخزن في المخ للذكريات . الزبده ما طلعت هي اللي سوا الككه و ما ادري للحين من هو ذاك القط و غضبي اللي كان على الجميع يروح و يجي 😂

سكون النفس معجب بهذا

[ظل امرأة]

المشاركة الأصلية كتبت بواسطة وعل الثلج

آميــن آميــن • يا هلا و الله و غلا بك يا ياسمين • مرورك أسعدني كثير و مع هذا الجو الممتع غيم و مطر 🌧 صحيت و أنا أسأل نفسي بسبب الغيم اللي كأنه وقت مغرب صرت أقول هذا صباح و إلا مغرب ما تأكدت إنه الصباح إلا سألت عامل الكافيتريا و جاوبني إنه الصباح ، يا روعة الجو بس يالله لك الحمد على رحمتك الوسيعه و على بديع صنعك للسحاب و البرق و الرعد و المطر . الأكيد إني فرحان هههه بابا فرحان استنى شويه 🤭 الله يفرح قلبك يا ظل طول ما أنتي عايشه و يعطيك طولة العمر •

ويفرح قلبك يا عالي بما يسر خاطرك ويسعدك دنيا وآخرة يا رب
أجواء الغيم والمطر مافي احلى منها
يتشابه فيهم الصباح والمسا ههههه
خاصة إذا كنت نايم اكيد يختلط الوقت عليك بسبب الغيم 🤭
يارب الفرحة تلازمك ما حييت ❤

وعل الثلج معجب بهذا

[كحيلان *]

المشاركة الأصلية كتبت بواسطة ظل امرأة

ويفرح قلبك يا عالي بما يسر خاطرك ويسعدك دنيا وآخرة يا رب
أجواء الغيم والمطر مافي احلى منها
يتشابه فيهم الصباح والمسا ههههه
خاصة إذا كنت نايم اكيد يختلط الوقت عليك بسبب الغيم 🤭
يارب الفرحة تلازمك ما حييت ❤

صدقتي الله يعيده من يوم جميل جدا . و الله نطلبه ملازمة الفرحة لنا طول ما حيينا ، الله يسعدك ياسمين و تحياتي الخاصة لك . تسلمين 🌸 .

ظل امرأة معجب بهذا

[كحيلان *]

من بعد الظهر بشوي طلعت للبراحة قدام البيت عند ظلال الشجر و صرت أقول الله يجزاك يخوي على غرس الشجر عند البراحه أمام البيت و كررت الدعوه بالله يجزاك خير و اسميه باسمه 😔 المهم أسولف مع ذاتي لحالي لين أذن العصر ، كل ما شفت حمام بري تونست و كل ما شفت بسه أتذكر الككه اللي عملتها وحده منهم في درج البيت 😭 بس مالي حق لانهم ضعوف و شلت من راسي المثل : الخير يخص و الشر يعم ، قطيت هذا المثل في الزباله 😄😂 إيه نسيت و أنا جالس بالظلال إلا لقيت بنقالي عامل نظافه إسمه ( أنيس ) و سولف معي ثم راح ، رهيب أنيس و كلمة رهيب بمعنى إنه شخص طيب و رائع .

[كحيلان *]

بزعجكم 😂 لأن الزكمه إرتدت جاي و أزعجتني صراحه صار يسيل خشمي سيل و أحتقن خشمي فقلت حان أخذ ثلاث أقراص من دواء الزكمه ، المشكله مكتوب على العلبه : مزيل للاحتقان بس ، ما ينشف الزكمه🤷🏻 ما ادري وش العلم لكن الزبده ثلاث أقراص و الحمدلله راح الإحتقان و نشفت الزكمه ، يا هي عذاب الزكمه صدق بس إحتسبتها عند ربِّ جل و علا .

[كحيلان *]

و ان سريت الليل لا لا تردوني ، ما سريت إلا لهيب الصدر صالي
من جمالك فزّت و ثارت جنوني ، يا لطيف الروح و اغلى من الغالي
طِلّ في صدري و تلقى وسط كوني ، حاجةٍ تكحل بها عين عذالي
و الله إن البعد طيّح لي اركوني ، الهواوي تايهٍ يا هوى بالي •••
•

[كحيلان *]

يا نسيم الليل ما هذا السؤال
يا نسيم الليل قد أحرقتني
و القمر لما تدنى و اقترب ، سائلا إياي : ماذا حلّ بي 😔
رعشةٌ حلّت بجسمي و اعتلت ، إنني فارقت فيها مأربي
لم أكن يوما أنتظر هكذا ، فاجعا وحدي أكفكف دمعتي

و لقاؤنا قد يتم بالقريب ، عَلّك فيني تناظر حالتي
لوني الشاحب و القلب العليل
من فراق الصّحب أحسن خِلّتي
يا نسيم الليل ما هذا السؤال
يا نسيم الليل قد أحرقتني

و القمر لما تدنا و اِقترب ، سائلاً إياي : ماذا حلّ بي ؟

•
•
•

بصوت / فهد السعد 💔

https://youtu.be/LzM5gUfdbdw?si=3PIoPjXoFj0sH1

سكون النفس معجب بهذا

[كحيلان *]

المشاركة الأصلية كتبت بواسطة وعل الثلج

بزعجكم 😂 لأن الزكمه إرتدت جاي و أزعجتني صراحه صار يسيل خشمي سيل و أحتقن خشمي فقلت حان أخذ ثلاث أقراص من دواء الزكمه ، المشكله مكتوب على العلبه : مزيل للاحتقان بس ، ما ينشف الزكمه🤷🏻 ما ادري وش العلم لكن الزبده ثلاث أقراص و الحمدلله راح الإحتقان و نشفت الزكمه ، يا هي عذاب الزكمه صدق بس إحتسبتها عند ربِّ جل و علا .

تدرون عهدي بالزكمه الشديده ذي مثل اللي حاصل معي الحين متى ؟ أصدمكم و الا لا 😂 بصدمكم و الله العظيم عهدي بها آخر مرّه و أنا صغير جدا يا حليلي 😂 أزكم و يمتلي خشمي مثل الرغاه رغاة الجمل و هو هادر و هايج تمتلي الزكمه بظواهر خشمي ما عادها في الباطن 😂 و الله العظيم حتى فمي يمتلي رغاه و أنا سادح على السرير و ما صارت رغاه و خليتها كذا إلا من تعب وش أنشف وش أسوي راح حيلي بالتنشيف حتى تسدحني الزكمه كما يسدح اندرتيكر هوق هوقن و ستيف اوستن .

الحاصل إني أنتظر أبوي متى يجي يوديني المستشفى و لما أجي المستشفى ما في كلام و لا شي أول ما يبدون به الدكاتره هو إعطائي البخار بواسطة جهاز مثل الخَزْنه فيه هوا حار و يحطونه على خشمي و فمي و استنشق الحراره وش أسوي مستسلم و شوي شوي تتفتح مناخيري و أشوف العافيه ثم يعطون أبوي العلاجات و نرجع البيت .

من زكمتي و أنا صغير جدا و من هذاك اليوم ما جتني مثل زكمتها إلا ذي الأيام في شوال 1445 هـ

[كحيلان *]

و أنا بسجل الدخول بإسم وعل الثلج جاني تركيز عالي و قلت إن شاء الله إنك وعل رغم الكسر و ألمس ركبتي المصابه و أطبطب عليها 😂 بسبب خفة وزني و توازني في تسلق ما لا تتسلقونه 😂 إن شا الله كلكم وعول و نتسلق جميع و نهبط بسلام و ان صار شي ما تتضرر الوعول • بيجيكم كلامي المهم في المشاركه اللي تحت خلاص بقفل ذي المشاركه 🔒•

[كحيلان *]

الكلام المهم : إني يا جماعة للحين صاحي من أمس الصباح إلى الليلة الثانيه الحين و ما فيني نوم أبد و ما أكلت أبدا شي اليوم الحمدلله تدرون إني ما أحب الأكل أصلا أحسه متعب ، بس ما في شعور بالجوع أبدا بس على شاهي و قهوة سويتها في مطبخنا ، الزين كل الزين في إني أكلم نفسي و تحدثني نفسي و أتفاعل مع السوالف بس مو بصوت مسموع أبدا بل بلا صوت أبدا و لا حتى تحريك الفم و البرطم الحمدلله و أتمنى خلاص يكون هذا طبعي 😭😭😭 فالكل يظن إني ساكت و بالعكس ضجيج من سوالف و ردود بس مخفيه عن الجميع و يا زينها من حالة لو تتلبسني تلبس بس طول العمر الباقي المكتوب لي 😔 كم عمر الوعل 😂 أما في العمر فالله يباركلي فيه و يبارك بعماركم .

[كحيلان *]

صب شاهي انا ابغى شي حالي
‏ملّ قلبي من شراب المرّ ملّه
‏•
‏ما كفى اني شاربٍ مرّ الليالي
‏صبّ شاهي لا تزيد الطين بلّه •

خلاص بعتمد على شرب القهوة السعودية و الشاهي أما الاسبريسو و البلاك كوفي إنسحبت منهم توبه ما فيها إلا وجع البطن و الراس و من ثم الجسم كله حتى المعنويه ما تسلم ، جسمي حساس بقوة و المعنويه حساسة بقوة و الأعصاب عندي حساسة جدا فلا مواخذه لا مواخذه 😂

سكون النفس معجب بهذا

[كحيلان *]

ما نمت يا عرب الله ، عيني قويه أبدا ما تبغى تنام تبغى تستمتع ، و الجوع يوم كامل ما شا الله ما أكلت شي بس سوايل و لا حاس أبدا بالجوع .

الزبده نقدت عمري و قلت أبشوف الروشته حقت علاج الزكمه ، إلا و مذكور فيه الأرق و إنعدام الشهيه تجي لبعض الأشخاص و لا تأخذ إلا جرعة وحده مقسمه مرتين في اليوم فقط ، و أنا شربت ثلاث أقراص مع بعض و ما انلام من شدة الزكمه القويه و اللي ما ريحتني أبغى ارتاح ، الحمدلله إن شاء الله عدت على خير و مذكور إن العلاج فيه خاصية إن بعد فتره يصير القرص الواحد ما عاد يجيب نتيجه فيحتاج الشخص لقرصين ثم ثلاثه و هكذا🤷🏻 يلا يلا بألتزم بالخطه المذكوره و إلا الدكتور قاللي خذ ثلاث أقراص صبح و عصر و ليل بس الزكمه سيل و سدت أنفي و حتى حلقي و عيوني أما عيوني الحمدلله رجعت طبيعيه • الحمد لله يا رب •

[كحيلان *]

[ أعذر الناس أعقل الناس ] الضمير ( هم ) كان غايب و الجملة : أعذر الناس هم أعقل الناس .

[كحيلان *]

هداني الله ثم رجع لي عقلي و خذيت أدويتي النفسيه 😂 أنتظر الهمده و أنوم .

سكون النفس معجب بهذا