فكرة الهجره للخارج بسبب الرهاب ..

[نصيبك يصيبك]

فكرة الهجره للخارج بسبب الرهاب ..

السلام عليكم

كيف حالكم اخواني نفساانيين :)

ان شاءلله بخير .. الحمدلله رمضان عدا على خير وباقي ايام ويخلص ..

بقولكم شي انا من فتره سنتين الى 3 سنين طرت على بالي فكره تراودني من فتره لفتره
هي اني اهاجر الى الخارج

امريكا او بريطانيا باللجوء الانساني وانا عندي اسبابي الخاصه ..

وفوق هذا الامراض النفسيه وعدم قدرتي على التأقلم بمجتمعي المريض اللي يفرض علي اشياء ما عندي المقدره اني اسويها
مثل هذه الامور مواجهه يوميا ( ديوانيات + مناسبات + إلخ .. ) وهذه الاشياء ملزوم اي رجل يعيش في هذا المجتمع يسويها
واذا ماسواها طلعوو عليه شائعات انه مو رجل ومايقدر يواجه وانا شخصيا جربت هالشي وانا بعمر صغير
اشياء لاتعد ولا تحصى تعبتني نفسياااااا انا اتوقع اذا رحت برا برتاح وبتشافى ..
مشكلتي هي المجتمع المتخلف وانا اتكلم عن فئه معينه ماجمعت ..
شرااايكم بالفكره هل اسويها او شنو لاني اتوقع اخرتها انتحار والعياذ بالله او هجره الى الخارج انا مابي اغضب ربي
لاني ياما وياما فكرت بالانتحار لكن هنالك خيارات مفتوحه لي مثل الهجره والعيش في الخارج وانا ماشوف فيها شي
فـ هل تتوقعون فيه قدره على انه يقبلون طلبي الهجره او رفض واذا فيه احد جرب يكتب تجربته

وجزاكم الله خير وشاكر لكم

المصدر: نفساني

[محمد البدراني]

هلا اخوي ولد الكويت

ما سئلت نفسك الغربة من بيصرف عليك ومن بيوقف معك لا قدر اذا جاك شي واقل شي لو جاك حادث او مشكلة في مطعم او مشكلة مع الجار


الغربة قاسية وانا اخوك

انت في ديرة الكل يتمنى يعيش فيها

الحل في العلاج الدوائي والعلاج السلوكي

اخوي انا مثلك كنت افكر اهاجر وكنت اتمنى اما دولة شرق اسيا مثل اندونيسا او مصر

قلت ياولد خذ لك شقه ومعها خدامه واعيش نص النسة في السعودية والنص الثاني في مصر

لكن عرفت انها مب حل وانها فقد افكار وهواجيس بسبب المرض واذا خف المرض قلت لنفسي وش الافكار الغبية هذي

اخوي طبيعي المجتمع يكون قاسي خاص في الخليج لكن ليش انت معطيهم اهمية خل الي يتكلم يتكلم طز فيهم

اخوي انا لي عشر سنين ما شفت عيال عماني ولا خوالي

جالس في البيت من الدوام للبيت ومن البيت للدوام

الحمدالله ماني مجبور على زيارتهم اول كانو يسئلون عني ولييش واكيد هذا ما فيه خير وانه داشر وسربوت ما يجي المناسبات ولا الاعياد والعزاء ولا نشوفه

كل المجتمع ما عاد يفرق معي وبالاصح كل الدنيا ما عاد تفرق معي

في الاخير اخوي انت عش حياتك زي ما تحب وكلامهم قطه ورى ظهرك


اخوي ولد الكويت انا متعاطف معك لان الفكرة ما زالت في راسي لكن وانا اخوك المرض بيسافر معنا وما يخلينى الله كتب علينا البلاء وعلينا الصبر والشكر لله على الاقل الواحد ياكل ويشرب وينام وعنده مصروفه ونعم الله لا تعد ولا تحصى

انا كنت انوي ان اخذ شقة في مصر في احد الاحياء الي فيها مقاهي مثل الحسين عشان مليت من الوحدة ومليت من الجدران على الاقل لو اجلس في المقاهي اشوف الناس رايحه وجايه وفيها تغيير ومصر شعب لا زال طيب

ساءل الراحة معجب بهذا

[نصيبك يصيبك]

حياك الله اخوي شفيق وكلامك على عيني وراسي
لكن انت غير وضعي انت محد يكلمك
انا اذا ماحضرت مناسبه بالغلط يخلونها تطلع من عيوني
بالنغزات او حتى بالكلام القاسي والجارح خاصة ابووي
والغربه مو هامتني انا عايش بديرتي وبين اهلي
وحاس بغربه مافرقت نفس الشي
وجزاك الله خير عالرد

[يتيم الروح]

ياولد الكويت والله ماهو حل أبداً كيف بتعيش بعيد عن والديك وأهلك ياخي قلبها في راسك والله الغربة صعبه صعبه أنا وأنت وغيرنا في هذا الموقع الإنساني كل منا لديه مشاكل وهموم ما الله بها عليم ونحتاج المساعدة والعون من أقرب القريبين لنا أب أم أخ أخت بين الوقت والآخر ونصيحه لوجه الله لا تشيل هم لكلام الناس أنا كنت حساس مثلك وأضرب حساب لكل كلمة يقولها الناس يعني حساس للغاية وفي النهاية عرفت أن الناس ذولي عيوبهم أكثر مني حط رجل على رجل وعيش الحياة اللي تعجبك والمراجل ماهي بصب قهوة ولا حضور مناسبة المراجل تجدها عند أصحاب القلوب الكبيرة والرحيمة والذين يتحلون بالأخلاق الرفيعة والقدوة الحسنة التي حثنها عليها ديننا الاسلامي وأنا أراهن أن الجميع هالصفات تتجسد داخلك على كل حال ياخوي أنا أخوك صابر على نفسي من خمس سنين وحالتي مثل حالتك ويمكن أسوء وما فكرت هالتفكير رغم كل الظروف والأجواء مهيئة لي لأنه ليس حل مقنع ، عن نفسي أريد فقط أن اتزوج وأعيش حياة كريمة وهادئة وزوجة بنت حلال تساعدني في ألتخلص من الوساويس وكثرة التفكير في الماضي خذها مني الزواج هو أفضل علاج لمريض الرهاب أنا فكرت فيها والله لو كلفني أني اتزوج فوق سطح بيتي المهم أن أجد امرأة تتفهم حالي وتشاركني أفراحي وأحزاني يارجل مللت من الوحده والإختلاء بنفسي سنوات طويلة من الهموم والقلق والتفكير في أمور ليس لها داعي الله يفرجها يااااارب

[عبد المجيد]

أخي العزيز ولد الكويت ...صحيح أن مجتمعاتنا الخليجية بالذات والعربية بشكل عام قاسية جدا ولك أن تتخيل ان دكتور بالرياض قال ان نسبة الرهاب في المجتمع السعودي عالية بالتصنيفات العالمية وهي ملاحظة لكثير من الاطباء الذين عملوا بالمنطقة .

وانا قريبا أتيت من احدى الدول للسياحة ووجدت ثقة بالنفس عالية بين الغربيين . بل الكل في حاله ... ماعندهم لقافة العرب .


ومع ذلك كله ماتقوله من السفر الى الدول الغربية مرفوض جملة وتفصيلا ... لأسباب يطول النقاش فيها ...

والحل كيف نفسك بأي طريقة سليمة وحاول الطناش وعدم التحسس وقبل كل شيء الدعاء والصبر ... والدنيا امتحان وبلاء للمؤمن .
حقا الدنيا سجن للمؤمن وجنة للكافر.

[نصيبك يصيبك]

اولا اعذروني عالتأخير في الرد
والله كلامك كله صح ..
بس انا حيل تعبت انتو يمكن ظروفكم تسمح انه تغيبون او تعتذرون
انا عمري 18 ومشاكلي كثيره اذا كبرت بعد كم سنه شنو راح يصير ؟
هذا اللي حط فكرة الهجره ببالي عالاقل ماحس علي ضغط وروحه ورده
هناك مشاوير للعمل او الاشياء البسيطه مو مضطر اني اجامل
جزاكم الله خير ويعطيكم العافيه

[متفائل ولكن]

انت مثل وضعي

اكاد اجزم ان اللي زاد الرهاب والاكتئاب عندي هو المجتمع اللي حولي

مجتمع قاسي مايرحم

والوالد مايعترف ابدا بشي اسمه رهاب او اكتئاب كل يوم قهوه او عشاء ومناسبات ماتنتهي واذا ماحضرت يزعل

واذا قابلتهم نظرات غريبه واسئله غبيه وينك ؟ ليش ماتطلع ودايم جالس بالبيت؟ انت نفسيه بلا بلا بلا ترجع البيت وضعك اسؤا من اول بسبب هالناس المتخلفه

حتى مايعطونك فرصه تتعافى

بما اني بالسعوديه ناوي ان شاء الله ابعد عن الديره واتوظف بالرياض ع الاقل كل واحد بحاله والاجتماعات بالويكند فقط مو مثل هنـا بشكل يومي

حاول تروح تدرس برا وتغير جو

ساءل الراحة معجب بهذا

[ظلي تخلى عني]

نفس تجربتك يالغالي
انسان بحالي وطول عمري ماشي جنب الجدار .. واحب اخدم الناس بالي اقدر عليه .
وكل هذا ما منع بعض البشر بتهامي اني مسجون بقضيه وتتسرب عني اشاعات غريبه
والسبب ان عندي رهاب اجتماعي وما اقدر اتواصل مع الناس الا بستنثناء الاهل و عدد بسيط من
الاشخاص بمجال عملي .

[منحووووسه]

انا لو رجل لهاجرت وارتحت
عالاقل اذا ماحضرت الاعياد اتحجح بالدراسه او السفر
لكن دامني هنا مجبورة احضر لو مااحضر قالوا نفسيه وان حضرت قالوا وشفيك كذا ماتفرحين بالعيد ماتشاركيننا بشي !!

ساءل الراحة معجب بهذا

[صابر الجزائري]

صحيح مجتمعنا العربي قاسي ومايرحم بهاذ الامور ولا تقول الخليج بس عندنا في الجزاير نفس الشي والله مايرحمك انسان ولايتفهم وضعك بالعكس يستهزون لما تقول رهاب ايش هذا رهاب.. انت انسان ضعيف وخواف وماعندك شخصيه مافي شي اسمو رهاب ..بينما في الغرب الناس عندها ثقافه وتتفاهم وتعرف ايش معنى المرض النفسي ويساعدون المريض ويهيؤو له اسباب الراحه ولايجبرون على فعل اشياء تزيد من محنته ويعطونه الحريه الكامله في تصرفاته وحياته زياده على التطور العلاج وجوده الادويه وشطاره الاطباء قد تكون بعد مشيئه الله سببا في الشفاء العاجل.. تبا لمجتمعاتنا الجاهله هي السبب في امراضنا وكأبتنا انا والله لو تسمح لي الظروف لاهجر وبلا رجعه ولا ابقى عايش في مجتمع لايرحم وتكون نهايتي الانتحار والعياذ بالله وخسروني في اخرتي مثل ما خسروني في دنيتي... لااله الا انت سبحانك أني كنت من الظالمين. الله المستعان والله يشفينا ويشفيك ويشفي كل مريض ويرفع عنا البلاء ويعوضنا خير آميييييييين يارب.

ساءل الراحة معجب بهذا

[صداقة]

وعليكم السلام
حلوة فكرة الهجرة وممكن تلقى علاج احسن ونفسيتك ترتاح لان مافي ضغوط عليك مثل بمجتمعك..بس انت استخير وممكن انك تجرب نسافر نشوف الاحوال كيف هناك قبل ماتأخد قرار الهجرة

صابر الجزائري معجب بهذا

[صداقة]

وانا نفسك تمام يامنحوسة اتمنى لو اقدر اهاجر

[شاطئ الراحة]

السلام عليكم يا اخوة الرهاب و الاكتءاب
كان عندي رهاب ،ثم رجع اكتءاب ثم قلق نفسي ثم وساوس و الحمد لله
سكنتني فكرة الهجرة ممذ كان عمري 22 سنة، بالنسبة لي هي فكرة موسمية، احيانا. تختفي حين تكون الامور عادية ، و لما تتعسر الاوظاع ترجع الفكرة....... ..... لي باع طويل في هذا الكلام
لكن قررت نهاءيا الهجرة هذه السنة بحول الله و قدرته ..... ان وفقني ربي. قبل العام الجديد
السفر يهدء النفس و يغير الحال ،و ينسي المرض و النكد ..... فيه نسبة للشفاء
احيانا اكاد اجزم ان الهجرة تكون حلا سليما ....... فالاوظاع تختلف من انسان لاخر
اعلم ان كلامي سيكون بردا و سلاما على قلب اخي نصيبك يصيبك
سافر اخي ، تجد عوضا عمن تفارقه
رايت وقوف الماء في مكان يفسده ، ان سال طاب و ان لم يسل لم يطب
و الشمس لو بقيت في السماء واقفة ، لملها الناس من عرب و من عجم
ان تغرب هذا عزا مطلبه ، و ان تغرب ذاك عزا كالذهب
نصيحتي لك اخي ....... سافر و توكل على الحي الذي لا يموت
ان امكنني التحدث اليك لاخبرتك ببرنامجي
و الله اعلم
سلام

صابر الجزائري معجب بهذا